ഓണക്കോടിയെടുക്കും മുൻപ് ശ്രദ്ധിക്കൂ; ഡ്രസ് സൈസ് ഏകീകരിക്കാൻ കേന്ദ്രം, S-M-L സൈസുകളിൽ വൻ മാറ്റം

ഓണക്കാല ഷോപ്പിങ്ങിനൊരുങ്ങുന്നവർക്ക് പ്രധാന അറിയിപ്പ്. രാജ്യത്ത് വസ്ത്രങ്ങളുടെ സൈസ് ഏകീകരിക്കാൻ കേന്ദ്രസർക്കാർ നടപടി ആരംഭിച്ചതായി റിപ്പോർട്ട്. നിലവിൽ ഓരോ ബ്രാൻഡിലും സ്മോൾ (S), മീഡിയം (M), ലാർജ് (L), എക്‌സ്‌ട്രാ ലാർജ് (XL) തുടങ്ങിയ സൈസുകൾക്ക് വ്യത്യസ്ത അളവുകളാണ് ഉപയോഗിക്കുന്നത്. ഇത് ഉപഭോക്താക്കളെ ആശയക്കുഴപ്പത്തിലാക്കുന്ന സാഹചര്യത്തിലാണ് പുതിയ നീക്കം.

എക്കണോമിക് ടൈംസ് റിപ്പോർട്ട് പ്രകാരം, പുതിയ സംവിധാനം നിലവിൽ വന്നാൽ ബ്രാൻഡ് ഏതായാലും ഒരേ സൈസിന് ഒരേ അളവായിരിക്കും. ഇതോടെ ഒരു ബ്രാൻഡിലെ മീഡിയം മറ്റൊരു ബ്രാൻഡിൽ ലാർജ് ആകുന്ന നിലവിലെ പ്രശ്നത്തിന് പരിഹാരമാകും.

പുരുഷന്മാരുടെ ഷർട്ടുകളുടെ സൈസ് സാധാരണയായി നെഞ്ചളവും പാന്റുകളുടെ സൈസ് അരയളവും അടിസ്ഥാനമാക്കിയാണ് നിശ്ചയിക്കുന്നത്. സ്ത്രീകളുടെ വസ്ത്രങ്ങൾക്കും നിലവിൽ വിവിധ ബ്രാൻഡുകൾ വ്യത്യസ്ത അളവുകളാണ് പിന്തുടരുന്നത്. പുതിയ നയത്തിലൂടെ ഇതെല്ലാം ഏകീകരിക്കാനാണ് ലക്ഷ്യം.

ഇതിനായി നാഷണൽ ഇൻസ്റ്റിറ്റ്യൂട്ട് ഓഫ് ഫാഷൻ ടെക്നോളജി (NIFT) രാജ്യവ്യാപകമായി പഠനം ആരംഭിച്ചിട്ടുണ്ട്. 15 വയസിന് മുകളിലുള്ള ഏകദേശം 25,000 പുരുഷന്മാരുടെയും സ്ത്രീകളുടെയും ശരീര അളവുകൾ ശേഖരിച്ചാണ് പുതിയ സൈസ് ചാർട്ട് തയ്യാറാക്കുന്നത്.

നിലവിൽ ഇന്ത്യയിൽ പല കമ്പനികളും യു.എസ്., യു.കെ. എന്നിവിടങ്ങളിലെ സൈസ് ചാർട്ടുകളാണ് പിന്തുടരുന്നത്. എന്നാൽ ഇന്ത്യക്കാരുടെ ശരീരഘടനയ്ക്ക് അനുയോജ്യമായ ഏകീകൃത സൈസ് സംവിധാനം കൊണ്ടുവരാനുള്ള നടപടികളാണ് ഇപ്പോൾ പുരോഗമിക്കുന്നത്. പുതിയ സംവിധാനം നിലവിൽ വന്നാൽ രാജ്യത്തെ വസ്ത്രവിപണിയിൽ വലിയ മാറ്റമുണ്ടാകുമെന്നാണ് വിലയിരുത്തൽ.