'ഭക്ഷണം കൊടുത്തത് കുറ്റമാണോ?'; കണ്ണുകെട്ടി അജ്ഞാത കേന്ദ്രത്തിലേക്ക്, ജന്തർ മന്തറിൽ പട്ടിണി മാറ്റിയവർക്ക് നേരെ നടപടി...

ജന്തർ മന്തറിൽ നടന്ന കോക്രോച്ച് ജനതാ പാർട്ടിയുടെ സമരത്തിനിടെ ആയിരക്കണക്കിന് സമരക്കാർക്ക് ഭക്ഷണം വിതരണം ചെയ്ത സാമൂഹിക പ്രവർത്തകനും നിയമ ബിരുദധാരിയുമായ ജുനൈദ് മാലിക് സുപ്രീം കോടതിയെ സമീപിച്ചു. പൊലീസ് തന്നെ നിയമവിരുദ്ധമായി കസ്റ്റഡിയിലെടുത്ത് പീഡിപ്പിച്ചെന്നും കുടുംബത്തെ വേട്ടയാടുകയാണെന്നും ആരോപിച്ചാണ് ഹർജി നൽകിയത്. ഹർജി ഇന്ന് കോടതി പരിഗണിക്കും.

ജൂലൈ 24-ന് രാത്രി ആശുപത്രിയിൽ നിന്ന് മടങ്ങുന്നതിനിടെ ഡൽഹി പൊലീസ് ഉദ്യോഗസ്ഥരെന്ന് പരിചയപ്പെടുത്തിയ സംഘം വാഹനം തടഞ്ഞ് തന്നെ കണ്ണുകെട്ടി അജ്ഞാത കേന്ദ്രത്തിലേക്ക് കൊണ്ടുപോയെന്നാണ് ജുനൈദിന്റെ ആരോപണം. സമരക്കാർക്ക് ഭക്ഷണവും വെള്ളവും എത്തിക്കാൻ പണം എവിടെ നിന്നാണ് ലഭിക്കുന്നതെന്ന് ചോദ്യം ചെയ്തതായും അദ്ദേഹം പറയുന്നു. പിന്നീട് തന്നെ ഉത്തരാഖണ്ഡിലെ മസൂരിയിൽ ഇറക്കിവിട്ടെന്നും അവിടെ നിന്ന് ഡൽഹിയിലേക്ക് മടങ്ങിയെന്നും ജുനൈദ് വ്യക്തമാക്കി.

തന്റെ പിതാവിനെ പൊലീസ് സ്റ്റേഷനിലേക്ക് വിളിച്ചുവരുത്തിയെന്നും കുടുംബാംഗങ്ങളുടെ രേഖകൾ പിടിച്ചെടുത്തെന്നും ബന്ധുക്കളെ കസ്റ്റഡിയിലെടുത്തെന്നും ജുനൈദ് ആരോപിക്കുന്നു.

എന്നാൽ ജുനൈദിന്റെ ആരോപണങ്ങൾ പൊലീസ് തള്ളി. അന്വേഷണത്തിന്റെ ഭാഗമായി പിതാവിനെ വിളിച്ചുവരുത്തിയതല്ലാതെ അനധികൃത നടപടികളൊന്നും ഉണ്ടായിട്ടില്ലെന്നാണ് ഗാസിയാബാദ് പൊലീസിന്റെ വിശദീകരണം. ബന്ധുക്കളെ കസ്റ്റഡിയിലെടുത്തെന്ന ആരോപണവും ബന്ധപ്പെട്ട ഉദ്യോഗസ്ഥർ നിഷേധിച്ചു.

സംഭവവുമായി ബന്ധപ്പെട്ട് സാമൂഹിക മാധ്യമങ്ങളിൽ നിരവധി ചർച്ചകൾ ഉയർന്നു. ജുനൈദ് കണ്ണീരോടെ സംസാരിക്കുന്ന വീഡിയോയും പിന്നീട് താനും കുടുംബവും സുരക്ഷിതരാണെന്നും ആവശ്യമായ നിയമസഹായം ലഭിക്കുന്നുണ്ടെന്നും വ്യക്തമാക്കുന്ന മറ്റൊരു വീഡിയോയും വൈറലായി.

കോൺഗ്രസ് രാജ്യസഭാ എം.പി. ഇമ്രാൻ പ്രതാപ്ഗഡി ഉൾപ്പെടെയുള്ള പ്രതിപക്ഷ നേതാക്കൾ ജുനൈദിന് പിന്തുണ പ്രഖ്യാപിച്ചു. വിഷയത്തിൽ പാർലമെന്റിൽ ശബ്ദമുയർത്തുമെന്നും അദ്ദേഹം പറഞ്ഞു. സമാജ്‌വാദി പാർട്ടിയും പൊലീസിന്റെ നടപടിയെ വിമർശിച്ച് രംഗത്തെത്തി.

അതേസമയം, ജുഡീഷ്യൽ സർവീസ് പരീക്ഷയ്ക്ക് തയ്യാറെടുക്കുന്ന തനിക്ക് യാതൊരു ക്രിമിനൽ പശ്ചാത്തലവുമില്ലെന്നും സമരക്കാർക്ക് ഭക്ഷണം നൽകിയത് മാത്രമാണ് ചെയ്തതെന്നും ജുനൈദ് പറയുന്നു. "വിശക്കുന്നവർക്ക് ഭക്ഷണം നൽകുന്നത് കുറ്റമാണെങ്കിൽ ആ കുറ്റം വീണ്ടും ചെയ്യാൻ തയ്യാറാണ്" എന്നായിരുന്നു അദ്ദേഹത്തിന്റെ പ്രതികരണം.