കമല ഇന്റർനാഷണൽ വിട്ടോ? 'കര്‍ത്തയുടെ മൊഴി നിങ്ങളുടെ സൃഷ്ടി' എന്ന് പിണറായി!

സിഎംആർഎൽ–എക്‌സാലോജിക് കേസിൽ തനിക്കും മകൾ വീണാ വിജയനുമെതിരെ ശശിധരൻ കർത്ത ഇഡിക്ക് മൊഴി നൽകിയെന്ന വാർത്ത മാധ്യമങ്ങൾ സൃഷ്ടിച്ചതാണെന്ന് പ്രതിപക്ഷ നേതാവ് പിണറായി വിജയൻ പറഞ്ഞു. ഇത്തരത്തിലുള്ള വാർത്തകൾ കുറേക്കാലമായി പ്രചരിപ്പിക്കുകയാണെന്നും, ഇതേ മാധ്യമങ്ങൾ മുൻ മന്ത്രി പി.കെ. ശ്രീമതിക്കെതിരെയും അടിസ്ഥാനരഹിതമായ വാർത്തകൾ നൽകിയിരുന്നുവെന്നും അദ്ദേഹം ആരോപിച്ചു.

സിഎംആർഎൽ വിഷയവുമായി ബന്ധപ്പെട്ട ആരോപണങ്ങൾ തന്റെ പേരിലേക്ക് എത്തിക്കാനുള്ള ശ്രമമാണ് നടക്കുന്നതെന്നും പിണറായി പറഞ്ഞു. "എങ്ങനെയെങ്കിലും എന്നിലേക്കെത്തിക്കാനാകുമോ എന്നാണല്ലോ പലരും നോക്കുന്നത്. എന്നോട് അത്രമാത്രം താൽപര്യമാണല്ലോ എല്ലാവർക്കും. അത് വരട്ടെ, എന്തെല്ലാം നമ്മൾ കണ്ടിരിക്കുന്നു," എന്നായിരുന്നു അദ്ദേഹത്തിന്റെ പ്രതികരണം.

വീണാ വിജയന് മറ്റൊരു കമ്പനിയുമായി ബന്ധമുണ്ടെന്ന ഇഡിയുടെ കണ്ടെത്തൽ മാധ്യമങ്ങൾ ചൂണ്ടിക്കാട്ടിയപ്പോൾ, "കമലാ ഇന്റർനാഷണൽ വിട്ടോ?" എന്നായിരുന്നു പിണറായിയുടെ മറുചോദ്യം.

ലേക്കർ ഇന്ത്യ കോർപറേഷൻ എന്ന കമ്പനിയിൽ വീണാ വിജയന് പങ്കാളിത്തമുണ്ടെന്ന സൂചന ഇഡി പുറത്തുവിട്ടിരുന്നു. ഇതുമായി ബന്ധപ്പെട്ട രേഖകൾ വീണയുടെ വീട്ടിൽ നിന്ന് കണ്ടെത്തിയതിനെ തുടർന്ന് കമ്പനിയുടെ ബാങ്ക് അക്കൗണ്ടിലുള്ള 15,57,414 രൂപ ഇഡി മരവിപ്പിക്കുകയും ചെയ്തു.

അതേസമയം, കഴിഞ്ഞ ഏപ്രിലിലാണ് സിഎംആർഎൽ മാനേജിംഗ് ഡയറക്ടർ ശശിധരൻ കർത്ത ഇഡിക്ക് മൊഴി നൽകിയത്. പിണറായി വിജയനുമായുള്ള ബന്ധത്തിന്റെ അടിസ്ഥാനത്തിലാണ് എക്‌സാലോജിക്കിന് പണം നൽകിയതെന്നും, എന്നാൽ വീണാ വിജയന്റെ കമ്പനി സിഎംആർഎലിന് യാതൊരു സേവനവും നൽകിയിട്ടില്ലെന്നുമാണ് അദ്ദേഹത്തിന്റെ മൊഴിയെന്ന് റിപ്പോർട്ടുകളുണ്ട്.

സേവനം നൽകാതെയാണ് എക്‌സാലോജിക് സിഎംആർഎലിൽ നിന്ന് പണം കൈപ്പറ്റിയതെന്നും, ആ തുക കള്ളപ്പണ നിരോധന നിയമപ്രകാരം കുറ്റകൃത്യത്തിലൂടെ സമ്പാദിച്ച വരുമാനമായി പരിഗണിക്കാമെന്നുമാണ് ഇഡിയുടെ നിലപാട്.