സിജെപി പ്രതിഷേധക്കാർക്ക് പാസ്‌പോർട്ട് റദ്ദാക്കിയോ? പ്രചരിക്കുന്ന വാർത്തയുടെ സത്യാവസ്ഥ

ന്യൂഡൽഹി: നീറ്റ് പരീക്ഷാ ക്രമക്കേടിൽ കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ രാജിവയ്ക്കണമെന്ന് ആവശ്യപ്പെട്ട് സിജെപി നടത്തുന്ന പ്രതിഷേധത്തിൽ പങ്കെടുക്കുന്നവരുടെ പാസ്‌പോർട്ട് റദ്ദാക്കുമെന്ന പ്രചാരണം തള്ളി ഡൽഹി പൊലീസ്. സമൂഹമാധ്യമങ്ങളിൽ പ്രചരിക്കുന്ന ഇത്തരം വാർത്തകൾ തെറ്റിദ്ധരിപ്പിക്കുന്നതാണെന്നും പ്രതിഷേധക്കാരുടെ പാസ്‌പോർട്ട് റദ്ദാക്കാൻ യാതൊരു തീരുമാനവും എടുത്തിട്ടില്ലെന്നും പൊലീസ് എക്‌സിലൂടെ അറിയിച്ചു.

ഔദ്യോഗികമായി സ്ഥിരീകരിക്കാത്ത വിവരങ്ങൾ പ്രചരിപ്പിക്കരുതെന്നും വിശ്വസനീയമായ ഔദ്യോഗിക അറിയിപ്പുകൾ മാത്രമേ പൊതുജനങ്ങൾ ആശ്രയിക്കാവൂ എന്നും ഡൽഹി പൊലീസ് അഭ്യർഥിച്ചു.

ജൂലൈ 20-ലെ പ്രതിഷേധവുമായി ബന്ധപ്പെട്ട് പങ്കെടുത്തവരുടെ പാസ്‌പോർട്ടുകൾ റദ്ദാക്കാൻ സിസിടിവി ദൃശ്യങ്ങളും മറ്റ് തെളിവുകളും പരിശോധിച്ച് നടപടി തുടങ്ങിയെന്ന തരത്തിലായിരുന്നു സമൂഹമാധ്യമങ്ങളിലെ പ്രചാരണം. എന്നാൽ ഇതിന് യാതൊരു അടിസ്ഥാനവുമില്ലെന്ന് പൊലീസ് വ്യക്തമാക്കി.

അതേസമയം, പാർലമെന്റ് മാർച്ചിനിടെ പൊലീസ് നടപടിയിൽ നിരവധി വിദ്യാർഥികൾക്ക് പരിക്കേറ്റതായി സിജെപി ആരോപിച്ചു. സംഭവത്തെ തുടർന്ന് വിവിധ മേഖലകളിലെ പ്രമുഖർ വിദ്യാർഥി സമരത്തിന് പിന്തുണ പ്രഖ്യാപിച്ചിട്ടുണ്ട്. വിദ്യാഭ്യാസമന്ത്രി രാജിവയ്ക്കുന്നതുവരെ സമാധാനപരമായ പ്രതിഷേധം തുടരുമെന്ന് സിജെപി അറിയിച്ചു. വിദ്യാഭ്യാസമന്ത്രിക്കും ആഭ്യന്തരമന്ത്രിക്കും രാജിവേണമെന്ന് പ്രതിപക്ഷവും ആവശ്യപ്പെട്ടു.

പ്രതിഷേധം ശക്തമായ സാഹചര്യത്തിൽ, ചോദ്യപ്പേപ്പർ ചോർച്ച തടയാൻ കർശന നിയമനടപടികൾ സ്വീകരിക്കുമെന്ന് പ്രധാനമന്ത്രി നരേന്ദ്ര മോദി വീഡിയോ സന്ദേശത്തിലൂടെ അറിയിച്ചു. ഇന്ന് ചേരുന്ന കേന്ദ്രമന്ത്രിസഭായോഗത്തിൽ ഇതുസംബന്ധിച്ച ബില്ലിന് അന്തിമരൂപം നൽകുമെന്നും യുവാക്കളുടെ ഭാവിയും ക്ഷേമവുമാണ് സർക്കാരിന്റെ മുൻഗണനയെന്നും കുറ്റക്കാർക്കെതിരെ കർശന നടപടി സ്വീകരിക്കുമെന്നും അദ്ദേഹം വ്യക്തമാക്കി.