ഫാസ്‌ടാഗ് നിയമങ്ങളിൽ നിർണായക മാറ്റം; ടോൾ ഇളവ് ലഭിക്കുന്നവർ അറിയേണ്ട കാര്യങ്ങൾ
ഭിന്നശേഷിക്കാർക്ക് ടോൾ ഇളവ് ലഭിക്കുന്ന ഡിസ്കൗണ്ട് ഫാസ്‌ടാഗിന്റെ കാലാവധി സംബന്ധിച്ച നിയമങ്ങൾ കേന്ദ്ര സർക്കാർ പരിഷ്കരിച്ചു. പുതിയ വ്യവസ്ഥ പ്രകാരം വൈകല്യത്തിന്റെ ശതമാനമനുസരിച്ച് മൂന്ന് മുതൽ അഞ്ച് വർഷം വരെ ഫാസ്‌ടാഗിന് സാധുത ലഭിക്കും. ഇതോടെ വർഷംതോറും പുതുക്കേണ്ട ബുദ്ധിമുട്ട് ഒഴിവാകും.
രാജ്യത്തെ ദേശീയപാതകളിലും എക്സ്പ്രസ് വേകളിലും ഉപയോഗിക്കുന്ന ഫാസ്‌ടാഗ് സംവിധാനത്തിൽ പുതിയ മാറ്റം. ഭിന്നശേഷിക്കാർക്ക് ടോൾ ഇളവ് ലഭിക്കുന്ന ഡിസ്കൗണ്ട് ഫാസ്‌ടാഗിന്റെ കാലാവധി സംബന്ധിച്ച നിയമങ്ങളാണ് കേന്ദ്ര റോഡ് ഗതാഗത, ഹൈവേ മന്ത്രാലയം പരിഷ്കരിച്ചത്. പുതിയ വ്യവസ്ഥകൾ ഇന്ന് മുതൽ പ്രാബല്യത്തിൽ വരുമെന്നാണ് റിപ്പോർട്ട്.
ഭിന്നശേഷിക്കാർക്ക് ടോൾ പ്ലാസകളിലൂടെ കൂടുതൽ എളുപ്പത്തിൽ യാത്ര ചെയ്യാൻ സൗകര്യമൊരുക്കുകയാണ് പുതിയ സംവിധാനത്തിന്റെ ലക്ഷ്യം. നേരത്തെ ഇളവുള്ള ഫാസ്‌ടാഗ് ഓരോ വർഷവും പുതുക്കേണ്ടിയിരുന്നു. ഇതിനായി വീണ്ടും അപേക്ഷയും ആവശ്യമായ രേഖകളും സമർപ്പിക്കേണ്ട സാഹചര്യമുണ്ടായിരുന്നു. പുതിയ നിയമം പ്രാബല്യത്തിൽ വരുന്നതോടെ വാർഷിക പുതുക്കൽ ഒഴിവാകും.
വൈകല്യത്തിന്റെ ശതമാനമനുസരിച്ച് കാലാവധി
പുതിയ വ്യവസ്ഥ പ്രകാരം വ്യക്തിയുടെ വൈകല്യത്തിന്റെ ശതമാനം അടിസ്ഥാനമാക്കിയാണ് ഡിസ്കൗണ്ട് ഫാസ്‌ടാഗിന്റെ കാലാവധി നിശ്ചയിക്കുക. 70 മുതൽ 100 ശതമാനം വരെ വൈകല്യമുള്ള യോഗ്യരായ വ്യക്തികൾക്ക് അഞ്ച് വർഷത്തെ സാധുത ലഭിക്കും. 40 ശതമാനത്തിന് മുകളിലും 70 ശതമാനത്തിന് താഴെയും വൈകല്യമുള്ളവർക്ക് മൂന്ന് വർഷത്തെ സാധുതയാണ് ലഭിക്കുക.
ഇനി എല്ലാ വർഷവും പുതുക്കേണ്ട
പുതിയ സംവിധാനം നിലവിൽ വരുന്നതോടെ അർഹരായ വ്യക്തികൾക്ക് വർഷംതോറും ഫാസ്‌ടാഗ് പുതുക്കുന്നതിനുള്ള നടപടികൾ പൂർത്തിയാക്കേണ്ടിവരില്ല. മൂന്ന് അല്ലെങ്കിൽ അഞ്ച് വർഷത്തെ കാലാവധി അവസാനിച്ച ശേഷം മാത്രമേ ആവശ്യമായ രേഖകൾ സഹിതം വീണ്ടും അപേക്ഷിക്കേണ്ടതുള്ളൂ. ഓൺലൈനായോ ഓഫ്‌ലൈനായോ അപേക്ഷ സമർപ്പിക്കാം. ഇതിലൂടെ രേഖകൾ സമർപ്പിക്കുന്നതുമായി ബന്ധപ്പെട്ട ബുദ്ധിമുട്ടുകളും കുറയും.
ടോൾ ഇളവിന് നിബന്ധനകൾ
എല്ലാ വാഹനങ്ങൾക്കും ഡിസ്കൗണ്ട് ഫാസ്‌ടാഗ് ലഭിക്കില്ല. അപേക്ഷകർക്ക് സർക്കാർ അംഗീകരിച്ച സാധുവായ വൈകല്യ സർട്ടിഫിക്കറ്റ് ഉണ്ടായിരിക്കണം. വാഹനം ഭിന്നശേഷിക്കാരന്റെ പേരിൽ രജിസ്റ്റർ ചെയ്തതോ അവരുടെ ഉപയോഗത്തിനായി പ്രത്യേകം രജിസ്റ്റർ ചെയ്തതോ ആയിരിക്കണം.
യോഗ്യതയുള്ള വാഹനങ്ങളിൽ പ്രത്യേക ഫാസ്‌ടാഗ് ഘടിപ്പിച്ചാൽ മാത്രമേ ടോൾ ഇളവ് ലഭിക്കൂ. അനർഹരായ വ്യക്തികൾ ഈ സൗകര്യം ദുരുപയോഗം ചെയ്യുന്നതായി കണ്ടെത്തിയാൽ ഫാസ്‌ടാഗ് കരിമ്പട്ടികയിൽ ഉൾപ്പെടുത്തുന്നതുൾപ്പെടെയുള്ള നടപടികൾ സ്വീകരിച്ചേക്കും.
ഡിജിറ്റൽ പരിശോധനയും ലളിതമാകും
ടോൾ പ്ലാസകളിലെ ഫാസ്‌ടാഗ് പരിശോധന കൂടുതൽ ലളിതമാക്കാനും പുതിയ സംവിധാനം സഹായിക്കുമെന്നാണ് സർക്കാർ വ്യക്തമാക്കുന്നത്. ഡിജിറ്റൽ പരിശോധനയിലൂടെ സമയം ലാഭിക്കുന്നതിനൊപ്പം വ്യാജ രേഖകൾ ഉപയോഗിച്ച് ടോൾ ഇളവ് നേടാനുള്ള ശ്രമങ്ങൾ തടയാനും സാധിക്കും.
അർഹരായ ഭിന്നശേഷിക്കാർക്ക് എൻഎച്ച്എഐയുടെയോ കേന്ദ്ര റോഡ് ഗതാഗത, ഹൈവേ മന്ത്രാലയത്തിന്റെയോ ഔദ്യോഗിക പോർട്ടൽ വഴി ദീർഘകാല സാധുതയുള്ള ഫാസ്‌ടാഗിന് അപേക്ഷിക്കാം. ഇതിനായി സാധുവായ യുഡിഐഡി കാർഡും ബന്ധപ്പെട്ട വാഹന രേഖകളും സമർപ്പിക്കേണ്ടതുണ്ട്.
അഭിപ്രായങ്ങൾ
ആദ്യം അഭിപ്രായം പറയൂ.