ജപ്പാനല്ലിത്, കേരളമാണ്’; കാസർകോട് റെയിൽവേ സ്റ്റേഷന്റെ വൃത്തിയിൽ അമ്പരന്ന് പഞ്ചാബി യാത്രികൻ

കേരളത്തിന്റെ വടക്കേയറ്റത്തെ പ്രധാന റെയിൽവേ സ്റ്റേഷനായ കാസർകോട് റെയിൽവേ സ്റ്റേഷന്റെ വൃത്തിയും യാത്രക്കാർക്കുള്ള സൗകര്യങ്ങളും കണ്ട് അമ്പരന്ന് പഞ്ചാബി യാത്രികൻ. ട്രാവൽ കണ്ടന്റ് ക്രിയേറ്റർ അന്മോൽ സന്ധു ഇൻസ്റ്റഗ്രാമിൽ പങ്കുവെച്ച വീഡിയോയിലാണ് കാസർകോട് റെയിൽവേ സ്റ്റേഷന്റെ ശുചിത്വത്തെ പ്രശംസിച്ചത്. ‘ജപ്പാനല്ലിത്, കേരളമാണ്’ എന്ന തരത്തിലുള്ള പ്രതികരണത്തോടെയാണ് അദ്ദേഹം വീഡിയോ പങ്കുവെച്ചത്. ഇതിനോടകം എട്ടുലക്ഷത്തിലേറെ പേർ വീഡിയോ കണ്ടതോടെ സമൂഹമാധ്യമങ്ങളിൽ ഇത് വൈറലായി. നിരവധി പേരാണ് വീഡിയോയ്ക്ക് താഴെ അഭിനന്ദനങ്ങളും അഭിപ്രായങ്ങളും രേഖപ്പെടുത്തിയത്.

‘ഇത് ജപ്പാനല്ല, കേരളമാണ്’ എന്ന തലക്കെട്ടോടെയാണ് ബാക്പാക്കർ അന്മോൽ എന്ന ഇന്‍സ്റ്റാഗ്രാം പേജിൽ വീഡിയോ പങ്കുവയ്ക്കപ്പെട്ടത്. കേരളത്തെക്കുറിച്ച് ചെറുപ്പം മുതൽ വിദ്യാഭ്യാസമുള്ളവരും പുരോഗമന ചിന്താഗതിയുള്ളവരുമായ ജനങ്ങളുടെ നാടെന്നു കേട്ടിരുന്നുവെന്നും, കേരളത്തിലെത്തിയപ്പോൾ അത് നേരിട്ട് അനുഭവിക്കാൻ കഴിഞ്ഞെന്നും അദ്ദേഹം പറയുന്നു. ഇന്ത്യയിൽ ഇത്രയും വൃത്തിയും മനോഹാരിതയുമുള്ള ഒരു റെയിൽവേ സ്റ്റേഷൻ ആദ്യമായാണ് കാണുന്നതെന്നും അന്മോൽ വ്യക്തമാക്കി. വീഡിയോയിൽ മാലിന്യങ്ങളും പൊടിയും ഇല്ലാത്ത വൃത്തിയുള്ള പ്ലാറ്റ്‌ഫോമും ട്രാക്കുകളും അന്മോൽ തന്‍റെ വീഡിയോയിൽ കാണിക്കുന്നു. ട്രെയിൻ കാത്തിരിക്കുന്ന യാത്രക്കാരുടെ ശാന്തമായ അന്തരീക്ഷവും അദ്ദേഹത്തെ ഏറെ ആകർഷിച്ചു. സാധാരണ കാത്തിരിപ്പ് സൗകര്യങ്ങൾക്ക് പുറമെ സുഖകരമായ ഇരിപ്പിടങ്ങളും മസാജ് ചെയറുകൾ ഉൾപ്പെടുന്ന പ്രത്യേക ലോഞ്ചും സ്റ്റേഷനിലുണ്ടെന്നും അദ്ദേഹം വീഡിയോയിൽ വ്യക്തമാക്കുന്നു.