പരിവാഹൻ തകരാർ രൂക്ഷം

വാഹന രജിസ്‌ട്രേഷൻ നടപടികൾ സ്തംഭനത്തിൽ

ഓണം കഴിഞ്ഞുള്ള വാഹന ഡെലിവറികളും പ്രതിസന്ധിയിൽ; അടിയന്തര സർക്കാർ ഇടപെടൽ ആവശ്യപ്പെട്ട് KADA

കൊച്ചി: സംസ്ഥാനത്തെ വാഹന ഡീലർഷിപ്പുകളിൽ രജിസ്‌ട്രേഷൻ നടപടികൾ ഗുരുതരമായി തടസ്സപ്പെട്ടിരിക്കുകയാണെന്ന് കേരള ഓട്ടോമൊബൈൽ ഡീലേഴ്സ് അസോസിയേഷൻ (KADA). കേന്ദ്ര സർക്കാരിന്റെ പരിവാഹൻ സോഫ്റ്റ്‌വെയറിൽ തുടരുന്ന സാങ്കേതിക തകരാറാണ് പ്രതിസന്ധിക്ക് കാരണമെന്നാണ് അസോസിയേഷൻ വ്യക്തമാക്കുന്നത്.

കഴിഞ്ഞ ഏതാനും മാസങ്ങളായി പരിവാഹൻ സംവിധാനത്തിൽ വിവിധ സാങ്കേതിക പ്രശ്നങ്ങൾ അനുഭവപ്പെട്ടിരുന്നുവെങ്കിലും കഴിഞ്ഞ നാല് ദിവസമായി സ്ഥിതി കൂടുതൽ ഗുരുതരമായതായി KADA അറിയിച്ചു.

വാഹനങ്ങളുടെ നികുതി അടയ്ക്കൽ, രജിസ്‌ട്രേഷൻ ഫീസ് പേയ്മെന്റ്, രജിസ്‌ട്രേഷൻ അപേക്ഷ സമർപ്പിക്കൽ, രജിസ്‌ട്രേഷൻ നടപടികളുടെ അന്തിമഘട്ടം പൂർത്തിയാക്കൽ തുടങ്ങിയ പ്രധാന സേവനങ്ങൾ പല ഡീലർഷിപ്പുകളിലും തടസ്സപ്പെട്ടിരിക്കുകയാണ്.

ഓണം കഴിഞ്ഞ് ഉപഭോക്താക്കൾക്ക് കൈമാറുന്നതിനായി നിരവധി വാഹനങ്ങൾ ഡീലർഷിപ്പുകളിൽ തയ്യാറാക്കിയിട്ടുണ്ടെങ്കിലും രജിസ്‌ട്രേഷൻ പൂർത്തിയാക്കാൻ സാധിക്കാത്തത് ഡെലിവറി നടപടികളെയും ബാധിച്ചിട്ടുണ്ട്. രജിസ്‌ട്രേഷൻ പൂർത്തിയാകാതെ വാഹനങ്ങൾ ഉപഭോക്താക്കൾക്ക് കൈമാറാൻ കഴിയാത്തതിനാൽ നിശ്ചയിച്ചിരുന്ന ഡെലിവറി ഷെഡ്യൂളുകൾ താളം തെറ്റുകയും ഉപഭോക്താക്കൾക്ക് അനാവശ്യമായ കാലതാമസം നേരിടേണ്ടിവരികയും ചെയ്യുന്നുവെന്ന് അസോസിയേഷൻ ചൂണ്ടിക്കാട്ടി.

നിലവിലെ പ്രശ്നം ഏതാനും ദിവസത്തെ സാങ്കേതിക തടസ്സമായി മാത്രം കാണാനാകില്ലെന്നും മാസങ്ങളായി തുടരുന്ന പ്രശ്നങ്ങൾക്ക് പിന്നാലെയാണ് ഇപ്പോഴത്തെ ഗുരുതരമായ തകരാറെന്നും KADA വ്യക്തമാക്കി. ഇത് സംസ്ഥാനത്തെ വാഹനവ്യാപാര മേഖലയിലെ ദൈനംദിന പ്രവർത്തനങ്ങളെ നേരിട്ട് ബാധിക്കുന്ന സാഹചര്യമാണെന്നും അസോസിയേഷൻ അറിയിച്ചു.

രജിസ്‌ട്രേഷൻ നടപടികളിലെ കാലതാമസം ഡീലർഷിപ്പുകളുടെ പ്രവർത്തനത്തെ മാത്രമല്ല, വാഹന വായ്പ, ഇൻഷുറൻസ്, ഡെലിവറി ഉൾപ്പെടെയുള്ള അനുബന്ധ നടപടികളെയും ബാധിക്കുന്നുണ്ട്.

പ്രശ്നത്തിന് അടിയന്തര പരിഹാരം ഉണ്ടായില്ലെങ്കിൽ രജിസ്‌ട്രേഷൻ പെൻഡൻസി കൂടുതൽ വർധിക്കുമെന്നും വരും ദിവസങ്ങളിൽ ഡീലർഷിപ്പുകളുടെയും ഉപഭോക്താക്കളുടെയും ബുദ്ധിമുട്ടുകൾ കൂടുതൽ രൂക്ഷമാകുമെന്നും KADA മുന്നറിയിപ്പ് നൽകി.

ഈ സാഹചര്യത്തിൽ കേരള സർക്കാരും ഗതാഗത വകുപ്പും ബന്ധപ്പെട്ട കേന്ദ്ര സർക്കാർ അധികൃതരും അടിയന്തരമായി ഇടപെടണമെന്ന് അസോസിയേഷൻ ആവശ്യപ്പെട്ടു. പരിവാഹൻ സോഫ്റ്റ്‌വെയറിലെ സാങ്കേതിക തകരാറുകൾ ഉടൻ പരിഹരിക്കുകയും ഇതിനകം കെട്ടിക്കിടക്കുന്ന രജിസ്‌ട്രേഷൻ അപേക്ഷകൾ വേഗത്തിൽ തീർപ്പാക്കുന്നതിനായി പ്രത്യേക സംവിധാനം ഏർപ്പെടുത്തുകയും വേണമെന്നാണ് ആവശ്യം.

വാഹന രജിസ്‌ട്രേഷൻ പോലുള്ള നിർണായക സേവനങ്ങൾ തടസ്സമില്ലാതെ ലഭ്യമാകുന്നതിനായി സ്ഥിരമായ സാങ്കേതിക പരിഹാരവും അടിയന്തര സഹായ സംവിധാനവും സർക്കാർ ഉറപ്പാക്കണമെന്നും KADA ആവശ്യപ്പെട്ടു.