പുതിയ ട്രയംഫ് ടൈഗർ 1200 എത്തുന്നു; പ്രധാന മാറ്റങ്ങളും സവിശേഷതകളും അറിയാം

പുതിയ സാങ്കേതികവിദ്യകളും കൂടുതൽ കരുത്തുറ്റ എൻജിനുമായി പുതുതലമുറ ടൈഗർ 1200 അഡ്വഞ്ചർ മോട്ടോർസൈക്കിൾ അവതരിപ്പിച്ച് ട്രയംഫ് മോട്ടോർസൈക്കിൾസ്. എൻജിൻ, സസ്‌പെൻഷൻ, ഡിസൈൻ, സുരക്ഷാ സംവിധാനങ്ങൾ എന്നിവയിൽ നിരവധി മാറ്റങ്ങളോടെയാണ് പുതിയ മോഡൽ എത്തുന്നത്. കുറഞ്ഞ വേഗതയിൽ മികച്ച നിയന്ത്രണം, കൂടുതൽ യാത്രാസുഖം, ആധുനിക റൈഡർ അസിസ്റ്റൻസ് സംവിധാനങ്ങൾ എന്നിവയാണ് പ്രധാന സവിശേഷതകൾ. ഇന്ത്യയിലെ ലോഞ്ച് തീയതിയും വിലയും കമ്പനി ഇതുവരെ പ്രഖ്യാപിച്ചിട്ടില്ല.

1,200 സിസി എൻജിൻ; 158 പിഎസ് കരുത്ത്

പുതിയ ടൈഗർ 1200ൽ 1,200 സിസി ടി-പ്ലെയിൻ ട്രിപ്പിൾ എൻജിനാണ് നൽകിയിരിക്കുന്നത്. 158 പിഎസ് കരുത്ത് ഉൽപ്പാദിപ്പിക്കുന്ന എൻജിന് മുൻ മോഡലിനെ അപേക്ഷിച്ച് 8 പിഎസ് അധിക കരുത്തുണ്ട്. പുതിയ പിസ്റ്റണുകൾ, പരിഷ്കരിച്ച സിലിണ്ടർ ഹെഡ്, ഭാരം കുറഞ്ഞ വാൽവുകൾ, മെച്ചപ്പെടുത്തിയ ഫ്യുവൽ ഇഞ്ചക്ഷൻ സംവിധാനം എന്നിവ എൻജിന്റെ പ്രവർത്തനക്ഷമത വർധിപ്പിക്കുന്നു.

ഗിയർബോക്സിലും ഷാഫ്റ്റ് ഡ്രൈവിലും മാറ്റങ്ങൾ വരുത്തിയിട്ടുണ്ട്. പുതിയ ഗിയർ അനുപാതങ്ങളും എൻജിൻ ട്യൂണിങ്ങും കുറഞ്ഞ വേഗതയിൽ ബൈക്ക് കൂടുതൽ സുഗമമായി നിയന്ത്രിക്കാൻ സഹായിക്കുമെന്നാണ് കമ്പനിയുടെ അവകാശവാദം. നഗരത്തിലെ തിരക്കേറിയ റോഡുകളിലും ദീർഘദൂര യാത്രകളിലും മികച്ച പ്രകടനം ലക്ഷ്യമിട്ടാണ് മാറ്റങ്ങൾ.

സീറ്റ് ഉയരം 30 എംഎം വരെ കുറയ്ക്കാം

പുതിയ ടൈഗർ 1200ന്റെ പ്രധാന സവിശേഷതകളിലൊന്നാണ് ഷോവയുടെ സെമി ആക്ടീവ് സസ്‌പെൻഷൻ സംവിധാനം. ഫേം, മീഡിയം, സോഫ്റ്റ് എന്നിങ്ങനെ മൂന്ന് ഡാംപിങ് മോഡുകൾ ഇതിലുണ്ട്.

ബൈക്ക് നിർത്തുമ്പോൾ സീറ്റ് ഉയരം സ്വമേധയാ 30 എംഎം വരെ കുറയ്ക്കാൻ ഈ സംവിധാനം സഹായിക്കും. ഇതിലൂടെ റൈഡർമാർക്ക് കാലുകൾ നിലത്ത് ഉറപ്പിച്ച് നിർത്താൻ എളുപ്പമാകും. ക്രമീകരിക്കാവുന്ന സീറ്റും സെന്റർ സ്റ്റാൻഡ് അസിസ്റ്റ് സംവിധാനവും യാത്ര കൂടുതൽ സൗകര്യപ്രദമാക്കുന്നു.

7 ഇഞ്ച് ടച്ച്‌സ്‌ക്രീനും സ്മാർട്ട് കണക്ടിവിറ്റിയും

ബോഷിന്റെ 7 ഇഞ്ച് എച്ച്ഡി ടച്ച്‌സ്‌ക്രീൻ ഡിസ്പ്ലേയാണ് പുതിയ മോഡലിൽ നൽകിയിരിക്കുന്നത്. വയർലെസ് ആപ്പിൾ കാർപ്ലേ, ആൻഡ്രോയിഡ് ഓട്ടോ എന്നിവയുടെ പിന്തുണയും ലഭിക്കും.

നാവിഗേഷൻ, സംഗീതം, സന്ദേശങ്ങൾ തുടങ്ങിയവ എളുപ്പത്തിൽ ഉപയോഗിക്കാനാകും. യുഎസ്ബി-സി ചാർജിങ് പോർട്ട്, ഫോൺ സൂക്ഷിക്കാനുള്ള പ്രത്യേക കമ്പാർട്ട്‌മെന്റ്, ഫോണിന്റെ ചൂട് നിയന്ത്രിക്കുന്ന സംവിധാനം എന്നിവയും ഉൾപ്പെടുത്തിയിട്ടുണ്ട്.

റഡാർ അധിഷ്ഠിത സുരക്ഷാ സംവിധാനങ്ങൾ

സുരക്ഷയ്ക്ക് കൂടുതൽ പ്രാധാന്യം നൽകിയാണ് പുതിയ ടൈഗർ 1200 രൂപകൽപ്പന ചെയ്തിരിക്കുന്നത്. ബോഷുമായി സഹകരിച്ച് വികസിപ്പിച്ച മുൻ, പിൻ റഡാർ സംവിധാനങ്ങളാണ് പ്രധാന ആകർഷണം.

അഡാപ്റ്റീവ് ക്രൂയിസ് കൺട്രോൾ, മുന്നിലെ കൂട്ടിയിടി മുന്നറിയിപ്പ്, അടിയന്തര ബ്രേക്കിങ് അസിസ്റ്റ്, ബ്ലൈൻഡ് സ്പോട്ട് അസിസ്റ്റ്, പിന്നിലെ വാഹനങ്ങളുടെ ദൂര മുന്നറിയിപ്പ് തുടങ്ങിയ സംവിധാനങ്ങൾ ലഭിക്കും.

അഡാപ്റ്റീവ് എൽഇഡി കോർണറിങ് ഹെഡ്‌ലൈറ്റുകളും എട്ട് റൈഡിങ് മോഡുകളും പുതിയ മോഡലിന്റെ സവിശേഷതകളാണ്. റാലി എക്സ്പ്ലോറർ പതിപ്പിൽ ഓഫ്-റോഡ് പ്രോ മോഡും ഉൾപ്പെടുത്തിയിട്ടുണ്ട്.

ജിടി പ്രോ, റാലി എക്സ്പ്ലോറർ പതിപ്പുകൾ

പുതിയ ടൈഗർ 1200 ജിടി പ്രോ, റാലി എക്സ്പ്ലോറർ എന്നീ പതിപ്പുകളിലാണ് എത്തുന്നത്. രണ്ട് മോഡലുകളിലും 19 ഇഞ്ച് മുൻ വീലും 17 ഇഞ്ച് പിൻ വീലുമാണ് നൽകിയിരിക്കുന്നത്. 200 എംഎം സസ്‌പെൻഷൻ ട്രാവലും ബ്രെംബോ സ്റ്റൈൽമ ബ്രേക്കുകളും ലഭിക്കും.

ജിടി പ്രോയിൽ കാസ്റ്റ് അലോയ് വീലുകളാണ് നൽകിയിരിക്കുന്നത്. റാലി എക്സ്പ്ലോററിൽ ഓഫ്-റോഡ് യാത്രകൾക്ക് അനുയോജ്യമായ സ്പോക്ക് വീലുകളാണുള്ളത്.

ജിടി പ്രോയിൽ 20 ലിറ്റർ ഇന്ധന ടാങ്കും റാലി എക്സ്പ്ലോററിൽ 30 ലിറ്റർ ടാങ്കുമാണ് ലഭിക്കുക. കൂടുതൽ സുഖകരമായ യാത്രയ്ക്കായി സീറ്റിലെ ഫോം കനം 10 എംഎം വർധിപ്പിച്ചിട്ടുണ്ട്. ഹീറ്റഡ് സീറ്റുകളും ക്രമീകരിക്കാവുന്ന ഹീറ്റഡ് ഗ്രിപ്പുകളും ഉൾപ്പെടുത്തിയിട്ടുണ്ട്.

പുതിയ ടൈഗർ 1200യിലൂടെ പ്രീമിയം അഡ്വഞ്ചർ മോട്ടോർസൈക്കിൾ വിഭാഗത്തിൽ കൂടുതൽ കരുത്തും സുരക്ഷയും യാത്രാസുഖവും ഉറപ്പാക്കാനാണ് ട്രയംഫിന്റെ ശ്രമം. ഇന്ത്യയിലെ ലോഞ്ച് തീയതിയും വിലയും ഔദ്യോഗികമായി പ്രഖ്യാപിക്കുന്നതോടെ കൂടുതൽ വിവരങ്ങൾ വ്യക്തമാകും.