അതിതീവ്ര മഴയിൽ റാന്നി ടൗൺ വെള്ളത്തിനടിയിൽ; പമ്പയാർ കരകവിഞ്ഞൊഴുകി, രക്ഷാപ്രവർത്തനം തുടരുന്നു

പത്തനംതിട്ട ജില്ലയിൽ ഒറ്റരാത്രി പെയ്ത അതിതീവ്ര മഴ ജനജീവിതത്തെ സാരമായി ബാധിച്ചു. കനത്ത മഴയെ തുടർന്ന് പമ്പയാർ കരകവിഞ്ഞൊഴുകുകയും റാന്നി ടൗൺ പൂർണമായും വെള്ളത്തിനടിയിലാകുകയും ചെയ്തു. വടശ്ശേരിക്കര, പെരുനാട്, ആറന്മുള തുടങ്ങിയ പ്രദേശങ്ങളിലെ താഴ്ന്ന മേഖലകളിലുള്ള നിരവധി വീടുകളിലും വെള്ളം കയറി.

റാന്നി ടൗണിലെ ഇടിയപ്പാറ ബസ് സ്റ്റാൻഡും വ്യാപാര സ്ഥാപനങ്ങളും വെള്ളത്തിൽ മുങ്ങി. നിരവധി കടകളിലും വാഹനങ്ങളിലേക്കും വെള്ളം കയറിയതോടെ വലിയ നാശനഷ്ടമാണ് ഉണ്ടായത്. പമ്പയാറ്റിലെ ജലനിരപ്പ് ഉയർന്നതിനെ തുടർന്ന് രാത്രി തന്നെ പൊലീസും അഗ്നിരക്ഷാസേനയും ജനപ്രതിനിധികളും ചേർന്ന് രക്ഷാപ്രവർത്തനം ആരംഭിച്ചു.

ഫയർഫോഴ്സിന്റെ ബോട്ടുകളും വനംവകുപ്പിന്റെ കുട്ടവഞ്ചികളും ഉപയോഗിച്ച് വീടുകളിലും കടകളിലും കുടുങ്ങിയവരെ സുരക്ഷിത കേന്ദ്രങ്ങളിലേക്ക് മാറ്റി. ആറന്മുള സത്രത്തിൽ കുടുങ്ങിയവരെയും രക്ഷപ്പെടുത്തി.

ചിറ്റാർ മേഖലയിലെ രണ്ടിടത്തും കൊക്കാത്തോട്ടിലും ഉരുൾപൊട്ടൽ റിപ്പോർട്ട് ചെയ്തെങ്കിലും ആളപായമോ പരുക്കുകളോ ഉണ്ടായിട്ടില്ല. പുനലൂർ–മൂവാറ്റുപുഴ റോഡും ചെങ്ങന്നൂർ–കോഴഞ്ചേരി റോഡും ഉൾപ്പെടെ നിരവധി പ്രധാന റോഡുകളിൽ വെള്ളം കയറിയതിനെ തുടർന്ന് ഗതാഗതം തടസ്സപ്പെട്ടു.

2018-ലെ പ്രളയത്തിന് സമാനമായ സാഹചര്യമാണെന്ന് പ്രദേശവാസികൾ പറയുന്നു. ജില്ലയിൽ പെയ്തത് അതിതീവ്ര മഴയാണെന്നും അതാണ് ഈ പ്രളയസാഹചര്യത്തിന് കാരണമായതെന്നും ജില്ലാ കലക്ടർ അറിയിച്ചു. അപകടസാധ്യതയുള്ള പ്രദേശങ്ങളിലുള്ളവർ ജാഗ്രത പാലിക്കണമെന്നും അധികൃതരുടെ നിർദേശങ്ങൾ കർശനമായി പാലിക്കണമെന്നും ദുരന്തനിവാരണ വകുപ്പ് അഭ്യർഥിച്ചു.