എമർജൻസി കിറ്റ് തയ്യാറാണോ? മഴക്കെടുതി മുൻനിർത്തി ദുരന്തനിവാരണ അതോറിറ്റിയുടെ നിർദേശം

തിരുവനന്തപുരം: സംസ്ഥാനത്ത് കനത്ത മഴ, വെള്ളപ്പൊക്കം, ഉരുൾപൊട്ടൽ എന്നിവയ്ക്ക് സാധ്യത തുടരുന്ന സാഹചര്യത്തിൽ ദുരന്ത സാധ്യതയുള്ള പ്രദേശങ്ങളിൽ താമസിക്കുന്നവർ എമർജൻസി കിറ്റ് തയ്യാറാക്കി സൂക്ഷിക്കണമെന്ന് സംസ്ഥാന ദുരന്ത നിവാരണ അതോറിറ്റി നിർദേശിച്ചു.

കുടിവെള്ളം, കേടാകാത്ത ഭക്ഷ്യവസ്തുക്കൾ, ഫസ്റ്റ് എയ്ഡ് കിറ്റ്, സ്ഥിരമായി കഴിക്കുന്ന മരുന്നുകൾ, പ്രധാന രേഖകളുടെ പകർപ്പുകൾ, ബാറ്ററിയിൽ പ്രവർത്തിക്കുന്ന റേഡിയോ, ടോർച്ച്, മെഴുകുതിരി, തീപ്പെട്ടി, മൊബൈൽ ഫോൺ, ചാർജർ, പവർ ബാങ്ക്, ഒരു ജോഡി വസ്ത്രം, ശുചിത്വ സാമഗ്രികൾ, വിസിൽ, കത്തി അല്ലെങ്കിൽ ബ്ലേഡ് തുടങ്ങിയവ എമർജൻസി കിറ്റിൽ ഉൾപ്പെടുത്തണമെന്ന് അധികൃതർ അറിയിച്ചു.

കുടുംബത്തിലെ എല്ലാവർക്കും എളുപ്പത്തിൽ എടുക്കാൻ കഴിയുന്ന സുരക്ഷിതമായ സ്ഥലത്ത് കിറ്റ് സൂക്ഷിക്കണമെന്നും അടിയന്തര സാഹചര്യമുണ്ടായാൽ വൈകാതെ സുരക്ഷിത കേന്ദ്രങ്ങളിലേക്ക് മാറാൻ തയ്യാറായിരിക്കണമെന്നും നിർദേശമുണ്ട്.

അതേസമയം, അടുത്ത അഞ്ച് ദിവസത്തേക്കുള്ള മഴ സാധ്യത പ്രവചനത്തിൽ വിവിധ ജില്ലകളിൽ കേന്ദ്ര കാലാവസ്ഥ വകുപ്പ് ഓറഞ്ച്, മഞ്ഞ അലർട്ടുകൾ പ്രഖ്യാപിച്ചിട്ടുണ്ട്. ഒറ്റപ്പെട്ട സ്ഥലങ്ങളിൽ അതിശക്തമായ മഴ, ഇടിമിന്നൽ, ശക്തമായ കാറ്റ് എന്നിവയ്ക്ക് സാധ്യതയുണ്ടെന്നാണ് മുന്നറിയിപ്പ്.

ഉരുൾപൊട്ടൽ, മണ്ണിടിച്ചിൽ സാധ്യതയുള്ള പ്രദേശങ്ങളിൽ താമസിക്കുന്നവർ അധികൃതരുടെ നിർദേശങ്ങൾ കർശനമായി പാലിക്കണം. നദികളിലും മറ്റ് ജലാശയങ്ങളിലും ഇറങ്ങുന്നത് ഒഴിവാക്കണം. മഴ ശക്തമാകുന്ന സമയങ്ങളിൽ അനാവശ്യ യാത്രകൾ ഒഴിവാക്കുകയും വെള്ളച്ചാട്ടങ്ങൾ, മലയോര മേഖലകൾ, ജലാശയങ്ങൾ എന്നിവിടങ്ങളിലേക്കുള്ള വിനോദയാത്രകൾ മാറ്റിവയ്ക്കുകയും വേണമെന്ന് ദുരന്ത നിവാരണ അതോറിറ്റി അറിയിച്ചു.