കാലവർഷക്കെടുതിയിൽ 26 മരണം; ₹67.44 കോടിയുടെ നാശനഷ്ടമെന്ന് മുഖ്യമന്ത്രി

സംസ്ഥാനത്ത് കാലവർഷക്കെടുതിയിൽ ഇതുവരെ 26 പേർ മരിച്ചതായും ₹67.44 കോടിയുടെ നാശനഷ്ടമുണ്ടായതായും മുഖ്യമന്ത്രി അറിയിച്ചു. ഏകദേശം 23,500 കർഷകരെ മഴക്കെടുതി ബാധിച്ചതായും അദ്ദേഹം പറഞ്ഞു. മന്ത്രിസഭാ യോഗത്തിന് ശേഷം നടത്തിയ വാർത്താസമ്മേളനത്തിലാണ് വിവിധ ധനസഹായങ്ങളും ദുരിതാശ്വാസ നടപടികളും മുഖ്യമന്ത്രി പ്രഖ്യാപിച്ചത്.

മരിച്ചവരുടെ കുടുംബങ്ങൾക്ക് ₹8 ലക്ഷം ധനസഹായം നൽകും. വീടും സ്ഥലവും പൂർണമായി നഷ്ടമായവർക്ക് ₹12 ലക്ഷം അനുവദിക്കും. ദുരിതബാധിത കുടുംബങ്ങളിലെ രണ്ട് പേർക്ക് ദിവസേന ₹300 വീതം നൽകാനും തീരുമാനിച്ചു. കടകൾ നശിച്ച വ്യാപാരികൾക്ക് ₹10,000 ധനസഹായവും ചെറുകിട സംരംഭകർക്ക് ₹12 ലക്ഷം വരെ പ്രത്യേക വായ്പാ സൗകര്യവും ലഭ്യമാക്കും. ഈ വായ്പയുടെ 9 ശതമാനം പലിശ സർക്കാർ വഹിക്കുമെന്നും മുഖ്യമന്ത്രി വ്യക്തമാക്കി.

രക്ഷാപ്രവർത്തനത്തിനിടെ മരിച്ച രാജേഷിന്റെ മൃതദേഹം ഔദ്യോഗിക ബഹുമതികളോടെ സംസ്കരിക്കുമെന്നും മുഖ്യമന്ത്രി അറിയിച്ചു.

ദുരന്തനിവാരണ പ്രവർത്തനങ്ങൾ കൂടുതൽ ശക്തിപ്പെടുത്തുന്നതിന്റെ ഭാഗമായി അണക്കെട്ടുകളിലും പുഴകളിലും അടിഞ്ഞുകൂടിയ മണലും ചെളിയും നീക്കം ചെയ്യുന്ന പ്രവർത്തനങ്ങൾ വേഗത്തിലാക്കും. ഡാം മാനേജ്മെന്റ് കൂടുതൽ കാര്യക്ഷമമാക്കാൻ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ ഉപയോഗപ്പെടുത്തും. ജിയോബാഗ് ഉപയോഗിച്ചുള്ള കടൽഭിത്തി നിർമ്മാണവും 'പുനർഗേഹം' പദ്ധതിയുടെ നവീകരണവും വേഗത്തിലാക്കുമെന്നും അറിയിച്ചു.

ദുരിതാശ്വാസ ക്യാമ്പുകളിൽ ആവശ്യമായ സൗകര്യങ്ങൾ ഉറപ്പാക്കിയിട്ടുണ്ടെന്നും പരാതികളുണ്ടെങ്കിൽ ഉടൻ പരിഹരിക്കുമെന്നും മുഖ്യമന്ത്രി പറഞ്ഞു. ജില്ലാ കലക്ടർമാർക്ക് ആവശ്യമായ അധികാരങ്ങളും ഫണ്ടും നൽകിയിട്ടുണ്ടെന്നും ദുരന്തനിവാരണ പ്രവർത്തനങ്ങൾ ഏകോപിപ്പിച്ച് മുന്നോട്ടുപോകുകയാണെന്നും അദ്ദേഹം വ്യക്തമാക്കി.