കുട്ടനാട്ടിൽ പ്രളയദുരിതം രൂക്ഷം; തിരുവല്ലയിൽ 6,000-ത്തിലധികം പേർ ദുരിതാശ്വാസ ക്യാമ്പുകളിൽ

പത്തനംതിട്ട: കിഴക്കൻ മേഖലകളിൽ നിന്ന് വെള്ളം ഒഴുകിയെത്തുന്നത് തുടരുന്നതിനാൽ കുട്ടനാട്ടിലും തിരുവല്ല മേഖലയിലും പ്രളയദുരിതം രൂക്ഷമായി തുടരുന്നു. നിരവധി വീടുകളിൽ വെള്ളം കയറിയതോടെ കുടുംബങ്ങൾ സുരക്ഷിത കേന്ദ്രങ്ങളിലേക്കും ദുരിതാശ്വാസ ക്യാമ്പുകളിലേക്കും മാറിയിരിക്കുകയാണ്.

തിരുവല്ലയിൽ വീടുകളിലേക്ക് കയറിയ വെള്ളം ഇതുവരെ പൂർണമായി ഇറങ്ങിയിട്ടില്ല. ജില്ലയിൽ മാത്രം 6,000-ത്തിലധികം പേരാണ് വിവിധ ദുരിതാശ്വാസ ക്യാമ്പുകളിൽ കഴിയുന്നത്. കടപ്ര, എടത്വ, വീയപുരം, ചെങ്ങന്നൂർ പാണ്ടനാട്, തിരുവൻവണ്ടൂർ തുടങ്ങിയ പ്രദേശങ്ങളിലും വെള്ളക്കെട്ട് തുടരുകയാണ്.

വെള്ളക്കെട്ടിനെ തുടർന്ന് എം.സി. റോഡിലെ തിരുവല്ല തിരുമൂലപുരം ഭാഗത്ത് ഗതാഗതക്കുരുക്ക് രൂക്ഷമാണ്. തിരുവല്ല–അമ്പലപ്പുഴ റോഡിലും തിരുവല്ല–മാവേലിക്കര റോഡിലും വെള്ളം കയറിയതോടെ വാഹനഗതാഗതം ദുഷ്‌കരമായിരിക്കുകയാണ്.

അപ്പർ കുട്ടനാട് മേഖലയിലെ ചാത്തങ്കരി ഉൾപ്പെടെയുള്ള ചില ദുരിതാശ്വാസ ക്യാമ്പുകളിലേക്കും വെള്ളം കയറുന്നതായി തിരുവല്ല എം.എൽ.എ വർഗീസ് മാമ്മൻ അറിയിച്ചു. ക്യാമ്പുകളിലുള്ളവരെ സുരക്ഷിത കേന്ദ്രങ്ങളിലേക്ക് മാറ്റാനുള്ള നടപടി പുരോഗമിക്കുകയാണെന്നും, ക്യാമ്പുകളിലേക്ക് ഭക്ഷണവും മറ്റ് അവശ്യസാധനങ്ങളും എത്തിക്കാൻ ബുദ്ധിമുട്ട് നേരിടുന്നതിനാൽ തിരുവല്ലയ്ക്ക് കൂടുതൽ സഹായം ആവശ്യമായ സാഹചര്യമാണെന്നും അദ്ദേഹം പറഞ്ഞു.

അതേസമയം, പ്രളയബാധിത പ്രദേശങ്ങളിലെ സ്ഥിതിഗതികൾ വിലയിരുത്തുന്നതിനായി മുഖ്യമന്ത്രി ഇന്ന് പത്തനംതിട്ടയിലെ ആറന്മുള, റാന്നി മേഖലകൾ സന്ദർശിക്കും. ദുരിതബാധിതരുടെ പരാതികൾ നേരിട്ട് കേൾക്കുന്ന മുഖ്യമന്ത്രി, രക്ഷാപ്രവർത്തനങ്ങളും പുനരധിവാസ നടപടികളും വിലയിരുത്തും. ബുധനാഴ്ച ചേരുന്ന മന്ത്രിസഭായോഗത്തിൽ പ്രളയബാധിതർക്കുള്ള കൂടുതൽ സഹായങ്ങളും ആശ്വാസ നടപടികളും പ്രഖ്യാപിക്കുമെന്നാണ് സൂചന.