മലപ്പുറത്ത് കനത്ത മഴയുടെ ദുരന്തം; നാലുവയസുകാരൻ മരിച്ചു, മണ്ണിടിച്ചിലും കടലാക്രമണവും രൂക്ഷം

സംസ്ഥാനത്ത് തുടരുന്ന കനത്ത മഴ മലപ്പുറം ജില്ലയിൽ വ്യാപക നാശനഷ്ടങ്ങൾ സൃഷ്ടിച്ചു. കൊണ്ടോട്ടി നീറാട് തോട്ടിൽ വീണ് നാല് വയസുകാരൻ ദാരുണമായി മരിച്ചു. കൊണ്ടോട്ടി മേലേപ്പറമ്പ് മങ്ങാട്ടുപറമ്പ് സ്വദേശി അബ്ദുൽ ഹമീദിന്റെ മകൻ ആദം ഐമനാണ് മരിച്ചത്. തോട്ടിൽ ജലനിരപ്പ് അപകടകരമായി ഉയർന്ന സാഹചര്യത്തിലായിരുന്നു അപകടം. നാട്ടുകാർ ഉടൻ ആശുപത്രിയിലെത്തിച്ചെങ്കിലും കുട്ടിയുടെ ജീവൻ രക്ഷിക്കാനായില്ല. മുതുവല്ലൂർ സ്കൂളിലെ എൽ.കെ.ജി വിദ്യാർഥിയായിരുന്നു ആദം ഐമൻ.

കനത്ത മഴയെ തുടർന്ന് മലപ്പുറം–കോട്ടക്കൽ റോഡിലെ വടക്കേമണ്ണയിൽ റോഡിലേക്ക് മണ്ണിടിഞ്ഞുവീണ് ഗതാഗതം തടസ്സപ്പെട്ടു. കൈനോട് പ്രദേശത്ത് മണ്ണിടിച്ചിലിൽ കുടുങ്ങിയ വീട്ടമ്മയെ രക്ഷപ്പെടുത്തി ആശുപത്രിയിലേക്ക് മാറ്റി. നിലമ്പൂർ പന്തീരായിരം വനമേഖലയിലും തോട്ടപ്പള്ളി ഭാഗത്തും ശക്തമായ മഴ തുടരുകയാണ്. വനത്തിനുള്ളിൽ ഉരുൾപൊട്ടൽ ഉണ്ടായോയെന്ന സംശയവും നിലനിൽക്കുന്നുണ്ട്. കുറവൻപുഴയിൽ മലവെള്ളപ്പാച്ചിലും ശക്തമാണ്.

പൊന്നാനി തീരത്ത് കടലാക്രമണവും രൂക്ഷമായി. ഹിളർപള്ളി, മുറിഞ്ഞഴി, ചുവന്ന റോഡ് മേഖലകളിൽ മൂന്ന് വീടുകൾ തകർന്നു. ശക്തമായ തിരമാലയും കാറ്റും കാരണം മത്സ്യബന്ധന ബോട്ടുകൾ സുരക്ഷയ്ക്കായി കരയിലേക്ക് തിരിച്ചെത്തി.

അതേസമയം, സംസ്ഥാനത്ത് കനത്ത മഴയും ഉരുൾപൊട്ടലും മൂലമുള്ള മരണസംഖ്യ അഞ്ചായി. ഇടുക്കി കുടയത്തൂരിൽ ഉരുൾപൊട്ടലിൽ സുമതി മരിച്ചു. കോട്ടയം പൂഞ്ഞാർ പയ്യാനിത്തോട്ടത്ത് വീട് തകർന്നുണ്ടായ അപകടത്തിൽ ജോസഫും റജീനയും മരിച്ചു. വാഗമൺ കോലാഹലമേട്ടിൽ വീടിന് മുകളിലേക്ക് മണ്ണിടിഞ്ഞ് വൈക്കം സ്വദേശി പ്രഭാകരൻ നായരും മരണപ്പെട്ടു. വിവിധ ജില്ലകളിൽ രക്ഷാപ്രവർത്തനങ്ങൾ തുടരുകയാണ്. ജനങ്ങൾ ജാഗ്രത പാലിക്കണമെന്നും അധികൃതരുടെ നിർദേശങ്ങൾ കർശനമായി അനുസരിക്കണമെന്നും ദുരന്തനിവാരണ വകുപ്പ് അഭ്യർഥിച്ചു.