'ഞങ്ങൾക്ക് തെറ്റുപറ്റി...'; തളിപ്പറമ്പിലടക്കം സ്ഥാനാർഥി നിർണയം പാളിയെന്ന് ഷംസീർ!

കഴിഞ്ഞ നിയമസഭാ തിരഞ്ഞെടുപ്പിലെ തിരിച്ചടിക്ക് കാരണമായ ചില പിഴവുകൾ പരസ്യമായി സമ്മതിച്ച് മുൻ സ്പീക്കർ എ.എൻ. ഷംസീർ. മലപ്പുറം കാളികാവിൽ നടന്ന പരിപാടിയിലാണ് തിരഞ്ഞെടുപ്പ് തോൽവിക്ക് കാരണമായ വിഷയങ്ങൾ അദ്ദേഹം വിശദീകരിച്ചത്.

പയ്യന്നൂരും തളിപ്പറമ്പും ഉൾപ്പെടെയുള്ള മണ്ഡലങ്ങളിൽ സ്ഥാനാർഥി നിർണയത്തിൽ പിഴവ് സംഭവിച്ചെന്ന് ഷംസീർ പറഞ്ഞു. വെള്ളാപ്പള്ളി നടേശന്റെ വിമർശനങ്ങൾക്കെതിരെ പാർട്ടി പ്രതികരിച്ചെങ്കിലും ആവശ്യമായ ശക്തിയോടെ പ്രതിരോധിക്കാൻ കഴിഞ്ഞില്ലെന്നും അദ്ദേഹം വ്യക്തമാക്കി.

അയ്യപ്പ സംഗമവുമായി ബന്ധപ്പെട്ട വിവാദത്തെയും ഷംസീർ പരാമർശിച്ചു. അയ്യപ്പ സംഗമം പാർട്ടി സംഘടിപ്പിച്ച പരിപാടിയല്ലെന്നും സർക്കാർ നടത്തിയ പരിപാടിയാണെന്നും അദ്ദേഹം പറഞ്ഞു. ആ ചടങ്ങിൽ ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്റെ സന്ദേശം വായിക്കേണ്ടിയിരുന്നില്ലെന്നും അതും പാർട്ടിക്കുള്ളിൽ വിമർശനവിധേയമായ വിഷയമായിരുന്നുവെന്നും ഷംസീർ പറഞ്ഞു.

പരാജയത്തിന്റെ കാരണങ്ങൾ കണ്ടെത്തി പാർട്ടി സ്വയം വിമർശനം നടത്തിയെന്നും ജനങ്ങൾ ചൂണ്ടിക്കാട്ടിയ തെറ്റുകൾ അംഗീകരിച്ച് തിരുത്തുമെന്നും അദ്ദേഹം വ്യക്തമാക്കി.

"ജനങ്ങളാണ് ജനാധിപത്യത്തിലെ യഥാർത്ഥ യജമാനൻമാർ. ഞങ്ങൾക്ക് തെറ്റുപറ്റിയെന്ന് ജനങ്ങൾ പറഞ്ഞാൽ അത് അംഗീകരിക്കും. പോരായ്മകൾ തിരുത്തി കൂടുതൽ ശക്തിയോടെ തിരിച്ചുവരും," എന്നാണ് ഷംസീറിന്റെ പ്രതികരണം.

ഷംസീറിന്റെ പ്രസംഗത്തിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. വീഡിയോയ്ക്ക് താഴെ അനുകൂലവും വിമർശനാത്മകവുമായ നിരവധി പ്രതികരണങ്ങളാണ് ഉയരുന്നത്.