പിണറായിക്കെതിരെ കേസെടുക്കുമോ? സർക്കാർ തീരുമാനം വൈകും; നിയമോപദേശം അടുത്തയാഴ്ച

മാസപ്പടിക്കേസിൽ ഇഡി ശുപാർശയുടെ അടിസ്ഥാനത്തിൽ പിണറായി വിജയനെതിരെ കേസെടുക്കുന്നതിൽ സർക്കാർ തീരുമാനം വൈകും. വിഷയത്തിൽ വിശദമായ നിയമപരിശോധനകൾക്ക് ശേഷം മാത്രമേ സർക്കാർ തീരുമാനമെടുക്കൂ. അഡ്വക്കറ്റ് ജനറലും ഡിജിപിയും ഉൾപ്പെടെയുള്ളവരുടെ നിയമോപദേശം അടുത്ത ആഴ്ച ലഭിക്കുമെന്നാണ് സൂചന.

പിണറായി വിജയനെതിരായ ഇഡി ശുപാർശ അതീവ ഗൗരവമുള്ളതാണെന്നും കേസെടുക്കണമെന്നുമാണ് പ്രതിപക്ഷ നേതാവ് വി.ഡി. സതീശന്റെ നിലപാട്. കേസെടുക്കേണ്ട സാഹചര്യമുണ്ടെന്നാണ് കെപിസിസി യോഗത്തിലും അദ്ദേഹം വിലയിരുത്തിയത്.

എന്നാൽ, വിഷയത്തിൽ എടുത്തുചാടി നടപടി സ്വീകരിക്കേണ്ടതില്ലെന്നായിരുന്നു യോഗത്തിലെ പൊതുധാരണ. പിണറായിക്കെതിരായ തുടർനടപടികൾ ആലോചിച്ച് മതിയെന്ന് വി.ടി. ബൽറാം അഭിപ്രായപ്പെട്ടു. അതേസമയം, ഉടൻ കേസെടുക്കണമെന്ന നിലപാടാണ് മാത്യു കുഴൽനാടൻ എംഎൽഎ സ്വീകരിച്ചത്.

നിയമപരമായ വശങ്ങൾ വിശദമായി പരിശോധിച്ച ശേഷം സർക്കാർ തീരുമാനമെടുക്കണമെന്ന് കെപിസിസി പ്രസിഡന്റ് ഉൾപ്പെടെയുള്ള നേതാക്കൾ ആവശ്യപ്പെട്ടു. പിണറായിക്കെതിരെ ഉടൻ കേസെടുക്കണമെന്ന് മാത്യു കുഴൽനാടൻ ആവശ്യപ്പെട്ടെങ്കിലും ആലോചിച്ച് മുന്നോട്ടുപോകണമെന്നായിരുന്നു വി.ടി. ബൽറാമിന്റെ അഭിപ്രായം.

നിയമപരമായി പരിശോധന നടത്തിയ ശേഷം തുടർനടപടി സ്വീകരിക്കുമെന്നും കേസെടുക്കേണ്ട സാഹചര്യമുണ്ടാകുമെന്നും വി.ഡി. സതീശൻ മറുപടി നൽകി. സംഭവം ഗൗരവതരമാണെന്നും സിപിഎം നേതാക്കളുടെ വിശദീകരണം തൃപ്തികരമല്ലെന്നും യോഗത്തിന് ശേഷം സണ്ണി ജോസഫ് പ്രതികരിച്ചു.

വിഷയത്തിൽ അഡ്വക്കറ്റ് ജനറലിന്റെയും ഡിജിപിയുടെയും നിയമോപദേശം ലഭിച്ച ശേഷമായിരിക്കും സർക്കാരിന്റെ തുടർനടപടി.