ഉഷ്ണതരംഗം, പിന്നാലെ കാട്ടുതീയും; ചരിത്രസാക്ഷിയായ ഡന്യൂബ് നദി വറ്റിവരളുന്നു

യൂറോപ്പിലെ ഏറ്റവും പ്രധാനപ്പെട്ട നദികളിലൊന്നായ ഡന്യൂബ് നദി കടുത്ത ഉഷ്ണതരംഗത്തെ തുടർന്ന് വറ്റിവരളുകയാണ്. ജലനിരപ്പ് കുത്തനെ കുറഞ്ഞതോടെ വർഷങ്ങളായി വെള്ളത്തിനടിയിൽ മറഞ്ഞുകിടന്നിരുന്ന പാറകളും മണൽത്തിട്ടകളും പഴയ കപ്പലുകളുടെ അവശിഷ്ടങ്ങളും രണ്ടാം ലോകമഹായുദ്ധകാലത്തെ ബോംബുകളും പുറത്തുവന്നു. വടക്കൻ ബൾഗേറിയയിൽ നിന്ന് പുരാതന മാമത്തിന്റെ ഫോസിൽ അവശിഷ്ടങ്ങളും കണ്ടെത്തിയിട്ടുണ്ട്.

ജർമനിയിൽ നിന്ന് ആരംഭിച്ച് 10 രാജ്യങ്ങളിലൂടെ ഒഴുകി കരിങ്കടലിൽ പതിക്കുന്ന ഡന്യൂബ് നദി യൂറോപ്പിന്റെ ചരിത്രത്തിനും സംസ്കാരത്തിനും സാക്ഷിയായ ജലപാതയാണ്. ഹംഗറിയുടെ തലസ്ഥാനമായ ബുഡാപെസ്റ്റിൽ ജലനിരപ്പ് വെറും 23 സെന്റിമീറ്ററായി താഴ്ന്നതോടെ നദിയുടെ അടിത്തട്ട് വ്യക്തമായി കാണുന്ന അവസ്ഥയാണ്.

ബൾഗേറിയയിൽ മണൽത്തിട്ടയിൽ കുടുങ്ങിയ വിനോദസഞ്ചാര കപ്പലിൽ നിന്ന് 186 പേരെ പൊലീസ് സുരക്ഷിതമായി രക്ഷപ്പെടുത്തി. ഭക്ഷണവും കുടിവെള്ളവും ലഭിക്കാതായതിനെ തുടർന്നാണ് അടിയന്തര രക്ഷാപ്രവർത്തനം നടത്തിയത്. സെർബിയയിൽ നൂറുകണക്കിന് ബോട്ടുകളും ചരക്കുകപ്പലുകളും നദീതീരത്ത് കുടുങ്ങിക്കിടക്കുകയാണ്. ക്രൊയേഷ്യയിൽ 1937-ൽ മുങ്ങിയ കപ്പലിന്റെയും രണ്ടാം ലോകമഹായുദ്ധകാലത്തെ ബോംബുകളുടെയും അവശിഷ്ടങ്ങൾ കണ്ടെത്തി.

ഡന്യൂബിലെ ജലനിരപ്പ് കുറയുന്നത് ആണവനിലയങ്ങളുടെ പ്രവർത്തനത്തെയും ബാധിച്ചിരിക്കുകയാണ്. ചില മേഖലകളിൽ വൈദ്യുതിക്ഷാമത്തിനും ഇത് കാരണമായിട്ടുണ്ട്. ഉടൻ മഴ ലഭിക്കുമെന്ന കാലാവസ്ഥാ പ്രവചനത്തിലാണ് യൂറോപ്യൻ രാജ്യങ്ങളുടെ പ്രതീക്ഷ.