ഭരിക്കുന്നവർക്ക് ആവശ്യമെങ്കിൽ സ്വന്തം വിമാനവും ഹെലികോപ്റ്ററും നൽകും; പ്രത്യുപകാരം വേണ്ടെന്ന് എം.എ. യൂസഫലി

ഭരിക്കുന്നവർക്കോ സർക്കാരുകൾക്കോ ആവശ്യം വന്നാൽ തന്റെ സ്വന്തം വിമാനവും ഹെലികോപ്റ്ററും വിട്ടുനൽകാൻ തയ്യാറാണെന്ന് ലുലു ഗ്രൂപ്പ് ചെയർമാൻ എം.എ. യൂസഫലി. ഇതിന് പകരമായി യാതൊരു പ്രത്യുപകാരവും തനിക്ക് ആവശ്യമില്ലെന്നും അദ്ദേഹം വ്യക്തമാക്കി. കേരളത്തിൽ ഉയർന്ന സ്വകാര്യ വിമാന യാത്രാ വിവാദവുമായി ബന്ധപ്പെട്ട ചോദ്യങ്ങളോട് പ്രതികരിക്കുകയായിരുന്നു യൂസഫലി.

കേരളത്തിലെ നിലവിലെ വിവാദത്തെക്കുറിച്ച് കൂടുതൽ അഭിപ്രായം പറയാനില്ലെന്നും വിവാദം ഉണ്ടാക്കിയവർ തന്നെ അത് അവസാനിപ്പിക്കട്ടെയെന്നും അദ്ദേഹം പറഞ്ഞു.

ഔദ്യോഗിക ആവശ്യത്തിനായി നടത്തിയ യാത്രയ്ക്ക് സർക്കാർ ഖജനാവിൽ നിന്ന് പണം ചെലവഴിച്ചിട്ടില്ലെന്ന് മുഖ്യമന്ത്രിയുടെ ഓഫീസ് നേരത്തെ അറിയിച്ചിരുന്നു. മലയാളിയായ ഒരു സുഹൃത്താണ് യാത്ര സ്പോൺസർ ചെയ്തതെന്ന് വി.ഡി. സതീശൻ വ്യക്തമാക്കിയിരുന്നു. എന്നാൽ സുഹൃത്തിന്റെ പേര് വെളിപ്പെടുത്താൻ തയ്യാറാകാതിരുന്നത് രാഷ്ട്രീയ ആരോപണങ്ങൾക്കും ചർച്ചകൾക്കും ഇടയാക്കി.

പൊതുപണം ഉപയോഗിച്ചിട്ടില്ലാത്തതിനാൽ സ്പോൺസറുടെ പേര് വെളിപ്പെടുത്തേണ്ട ആവശ്യമില്ലെന്നാണ് വി.ഡി. സതീശന്റെ നിലപാട്. മുൻ മുഖ്യമന്ത്രിമാരും സ്വകാര്യ സഹായത്തോടെ യാത്രകൾ നടത്തിയിട്ടുണ്ടെന്നും ജനങ്ങളുടെ പണം ലാഭിക്കാൻ സുഹൃത്തുക്കളുടെയോ അഭ്യുദയകാംക്ഷികളുടെയോ സഹായം ലഭിച്ചാൽ ഭാവിയിലും സ്വകാര്യ വിമാനങ്ങൾ ഉപയോഗിക്കുമെന്നും അദ്ദേഹം വ്യക്തമാക്കിയിട്ടുണ്ട്.

യാത്രയ്ക്കായി ഉപയോഗിച്ചത് കർണാടക മന്ത്രി കെ.ജെ. ജോർജിന്റെ കുടുംബത്തിന്റെ ഉടമസ്ഥതയിലുള്ള കേളചന്ദ്ര ഏവിയേഷന്റെ വിമാനമാണെന്നാണ് പുറത്തുവന്ന വിവരം. സംസ്ഥാന സർക്കാരിന്റെ ഹെലികോപ്റ്റർ കരാർ പുതുക്കാൻ അപേക്ഷ നൽകിയ ചിപ്‌സൺ ഏവിയേഷനുമായി ബന്ധപ്പെട്ട രേഖകൾ പുറത്തുവന്നതോടെയാണ് വിഷയം കൂടുതൽ ചർച്ചയായത്.

യാത്രയുമായി ബന്ധപ്പെട്ട 19,88,595 രൂപയുടെ വിമാന ബിൽ ചിപ്‌സൺ ഏവിയേഷന് നൽകിയതുമായി ബന്ധപ്പെട്ട രേഖകളാണ് പുറത്തുവന്നത്. ഇതോടെ സ്വകാര്യ വിമാന യാത്രയും അതിന്റെ ചെലവ് വഹിച്ചതുമായി ബന്ധപ്പെട്ട രാഷ്ട്രീയ ചർച്ചകൾ തുടരുകയാണ്.