ചേരാനല്ലൂർ വാഹനാപകടം: 17കാരന്റെ ഫോണിൽ നിന്ന് ഡിലീറ്റ് ചെയ്ത ഇൻസ്റ്റഗ്രാം വിവരങ്ങൾ വീണ്ടെടുക്കാൻ അന്വേഷണ സംഘം

ചേരാനല്ലൂർ കണ്ടെയ്നർ റോഡിലുണ്ടായ വാഹനാപകടക്കേസിൽ പ്രതിയായ 17കാരന്റെ മൊബൈൽ ഫോണിൽ നിന്ന് ഡിലീറ്റ് ചെയ്ത വിവരങ്ങൾ വീണ്ടെടുക്കാനുള്ള നടപടികളുമായി അന്വേഷണ സംഘം. ഇൻസ്റ്റഗ്രാം ഉൾപ്പെടെയുള്ള സോഷ്യൽ മീഡിയ അക്കൗണ്ടുകളിലെ വിവരങ്ങൾ ഡിലീറ്റ് ചെയ്ത നിലയിലാണെന്നാണ് റിപ്പോർട്ട്. കൂടുതൽ തെളിവുകൾ ശേഖരിക്കുന്നതിനായി ഫോൺ വിദഗ്ധ പരിശോധനയ്ക്ക് അയക്കാനാണ് പൊലീസിന്റെ തീരുമാനം.

അപകടക്കേസിലെ പ്രതിയായ 17കാരൻ അഡീഷണൽ ജില്ലാ ജഡ്ജിയുടെ മകനാണ്. പ്രായപൂർത്തിയാകാത്ത മകന് വാഹനം ഓടിക്കാൻ നൽകിയെന്ന ആരോപണത്തിൽ വാഹനത്തിന്റെ രജിസ്ട്രേഷൻ സർട്ടിഫിക്കറ്റ് ഉടമയായ ജഡ്ജിക്കെതിരെയും മോട്ടോർ വാഹന നിയമത്തിലെ സെക്ഷൻ 199A പ്രകാരം പൊലീസ് കേസെടുത്തിട്ടുണ്ട്.

എന്നാൽ മകന് വാഹനമോടിക്കാൻ അറിയാമെന്ന കാര്യം തനിക്ക് അറിയില്ലായിരുന്നുവെന്ന നിലപാടിലാണ് ജഡ്ജി. കഴിഞ്ഞ ദിവസം നടന്ന ചോദ്യം ചെയ്യലിലും അദ്ദേഹം ഇതേ മൊഴി ആവർത്തിച്ചതായാണ് വിവരം. ഈ വാദത്തിന്റെ നിജസ്ഥിതി പരിശോധിക്കുന്നതിനായി 17കാരൻ മുമ്പ് വാഹനമോടിച്ചതിന്റെ ദൃശ്യങ്ങൾ ശേഖരിക്കാനാണ് അന്വേഷണ സംഘത്തിന്റെ നീക്കം.

അപകടസമയത്ത് കൗമാരക്കാരൻ ഓടിച്ചിരുന്ന ആഡംബര കാർ മണിക്കൂറിൽ 104 കിലോമീറ്ററിലധികം വേഗതയിലായിരുന്നുവെന്നാണ് അന്വേഷണത്തിൽ ലഭിച്ച വിവരം. അമിതവേഗതയിൽ വാഹനമോടിച്ചതുമായി ബന്ധപ്പെട്ട മൊബൈൽ ദൃശ്യങ്ങളും അന്വേഷണ സംഘം പരിശോധിക്കുന്നുണ്ട്.

ഇതിനുമുമ്പ് 17കാരൻ മണിക്കൂറിൽ 208 കിലോമീറ്റർ വേഗതയിൽ വാഹനമോടിക്കുന്ന ദൃശ്യങ്ങൾ സമൂഹമാധ്യമങ്ങളിൽ പങ്കുവെച്ചിരുന്നതായി അപകടത്തിൽ മരിച്ച ജയബാലകൃഷ്ണന്റെ കുടുംബം ആരോപിച്ചിരുന്നു. ഈ ആരോപണത്തിന്റെ നിജസ്ഥിതിയും പൊലീസ് പരിശോധിക്കും.

ഫോണിൽ നിന്ന് ഡിലീറ്റ് ചെയ്ത വിവരങ്ങൾ വീണ്ടെടുക്കുന്നതിലൂടെ കൗമാരക്കാരന്റെ മുൻകാല വാഹന ഉപയോഗത്തെക്കുറിച്ചും അപകടവുമായി ബന്ധപ്പെട്ട സാഹചര്യങ്ങളെക്കുറിച്ചും കൂടുതൽ തെളിവുകൾ ലഭിക്കുമെന്നാണ് അന്വേഷണ സംഘത്തിന്റെ പ്രതീക്ഷ. ഡിജിറ്റൽ തെളിവുകളുടെ അടിസ്ഥാനത്തിൽ കേസിൽ തുടർനടപടികൾ സ്വീകരിക്കാനാണ് പൊലീസിന്റെ തീരുമാനം.