ജനശതാബ്ദിയിൽ പുഷ്ബാക്ക് സീറ്റുകൾ വീണ്ടും; പുതിയ നോൺ എസി കോച്ചുകളുടെ ചിത്രങ്ങൾ പുറത്തുവിട്ട് റെയിൽവേ

കേരളത്തിൽ സർവീസ് നടത്തുന്ന ജനശതാബ്ദി എക്സ്പ്രസുകളിലെ നോൺ എസി ചെയർകാർ കോച്ചുകളിൽ പുഷ്ബാക്ക് സീറ്റുകൾ തിരിച്ചെത്തുന്നു. പുതിയ നോൺ എസി ചെയർകാർ കോച്ചുകളുടെ ചിത്രങ്ങൾ തിരുവനന്തപുരം റെയിൽവേ ഡിവിഷൻ സമൂഹമാധ്യമങ്ങളിലൂടെ പങ്കുവെച്ചു. തിരുവനന്തപുരം–കോഴിക്കോട്, തിരുവനന്തപുരം–കണ്ണൂർ ജനശതാബ്ദി എക്സ്പ്രസുകൾ വൈകാതെ പുതിയ കോച്ചുകളുമായി സർവീസ് ആരംഭിക്കുമെന്നാണ് റെയിൽവേ അറിയിച്ചിരിക്കുന്നത്.

നിലവിലെ നോൺ എസി കോച്ചുകളിലെ സീറ്റുകളെക്കുറിച്ച് യാത്രക്കാരിൽ നിന്ന് വ്യാപകമായ പരാതികൾ ഉയർന്നിരുന്നു. 90 ഡിഗ്രിയിൽ ക്രമീകരിച്ചിരിക്കുന്ന സീറ്റുകൾ ദൂരയാത്രയ്ക്ക് അനുയോജ്യമല്ലെന്നായിരുന്നു പ്രധാന പരാതി. ദീർഘനേരം ഇത്തരം സീറ്റുകളിൽ ഇരിക്കുന്നത് ശാരീരിക അസ്വസ്ഥതകൾക്ക് കാരണമാകുന്നതായും മൂന്ന് പേർക്ക് ഒരുമിച്ചിരിക്കാൻ മതിയായ സൗകര്യമില്ലെന്നും യാത്രക്കാർ പരാതിപ്പെട്ടിരുന്നു.

ജനശതാബ്ദി എക്സ്പ്രസുകൾ പഴയ ഐസിഎഫ് കോച്ചുകളിൽ നിന്ന് എൽഎച്ച്ബി കോച്ചുകളിലേക്ക് മാറിയതോടെയാണ് സീറ്റുകളുടെ രൂപകൽപ്പനയിലും മാറ്റമുണ്ടായത്. ഐസിഎഫ് കോച്ചുകളിൽ പുഷ്ബാക്ക് സീറ്റുകളാണ് ഉണ്ടായിരുന്നത്. എന്നാൽ എൽഎച്ച്ബി കോച്ചുകളിലേക്ക് മാറിയതോടെ നോൺ എസി വിഭാഗത്തിലെ സീറ്റുകൾ മെമു ട്രെയിനുകളിലേതിന് സമാനമായി. എസി കോച്ചുകളിൽ മാത്രമാണ് പുഷ്ബാക്ക് സീറ്റുകൾ ലഭ്യമായിരുന്നത്.

സീറ്റുകളുടെ അസൗകര്യം ചൂണ്ടിക്കാട്ടി യാത്രക്കാർ റെയിൽവേയ്ക്ക് നിരന്തരം പരാതികൾ നൽകിയിരുന്നു. അടുത്ത നവീകരണത്തിൽ പ്രശ്നത്തിന് പരിഹാരം കാണുമെന്നായിരുന്നു റെയിൽവേയുടെ മറുപടി.

ഇതിന്റെ ഭാഗമായാണ് ജനശതാബ്ദി എക്സ്പ്രസുകളിലെ നോൺ എസി കോച്ചുകളിൽ വീണ്ടും പുഷ്ബാക്ക് സീറ്റുകൾ ഉൾപ്പെടുത്തുന്നത്. പുതിയ കോച്ചുകൾ സർവീസിലെത്തുന്നതോടെ ദൂരയാത്രക്കാരുടെ യാത്ര കൂടുതൽ സുഖകരമാകുമെന്നാണ് പ്രതീക്ഷിക്കുന്നത്.