ടാറ്റാ ഗ്രൂപ്പിനെ തകർക്കാൻ ക്രിമിനൽ നീക്കം; ആഭ്യന്തര തർക്കങ്ങൾക്ക് പിന്നിൽ കേന്ദ്രസർക്കാർ’ – കോൺഗ്രസ്

ഇന്ത്യൻ വ്യവസായ രംഗത്തെ പ്രമുഖ സ്ഥാപനമായ ടാറ്റാ ഗ്രൂപ്പിനെ ക്രിമിനൽ ബുദ്ധിയോടെ തകർക്കാൻ ശ്രമിക്കുന്നുവെന്ന ആരോപണവുമായി കോൺഗ്രസ് നേതാവ് രാഹുൽ ഗാന്ധി. പ്രധാനമന്ത്രി നരേന്ദ്ര മോദിയും കേന്ദ്ര ആഭ്യന്തരമന്ത്രി അമിത് ഷായും ഇന്ത്യൻ വ്യവസായ മേഖലയെ കളിപ്പാവകളാക്കി മാറ്റുകയാണെന്നും രാഹുൽ വിമർശിച്ചു.

രാജ്യത്തെ പ്രമുഖ വ്യവസായികളും കോർപ്പറേറ്റ് നേതാക്കളും വിഷയത്തിൽ മൗനം പാലിക്കുകയാണെന്നും അദ്ദേഹം ആരോപിച്ചു. ടാറ്റാ സൺസ് ബോർഡും ടാറ്റാ ട്രസ്റ്റും തമ്മിലുള്ള ആഭ്യന്തര തർക്കം രൂക്ഷമാകുന്നതിനിടെയാണ് രാഹുൽ ഗാന്ധിയുടെ പ്രതികരണം.

ടാറ്റാ സൺസ് ചെയർമാനായി എൻ. ചന്ദ്രശേഖരനെ വീണ്ടും നിയമിച്ചതിനെതിരെ ടാറ്റാ ട്രസ്റ്റ്സ് ചെയർമാൻ നോയൽ ടാറ്റ എതിർപ്പ് ഉന്നയിച്ചിരുന്നു. സെപ്റ്റംബർ 17ന് നടന്ന ബോർഡ് യോഗത്തിലാണ് ചന്ദ്രശേഖരന്റെ പുനർനിയമനം സംബന്ധിച്ച പ്രമേയം പാസാക്കിയത്.

എന്നാൽ കമ്പനിയുടെ ചട്ടങ്ങൾക്ക് വിരുദ്ധമായാണ് പ്രമേയം പാസാക്കിയതെന്നും അതിനാൽ നിയമപരമായി നിലനിൽക്കില്ലെന്നുമാണ് നോയൽ ടാറ്റയുടെ വാദം. ഈ വിഷയത്തെ തുടർന്നാണ് ടാറ്റാ ഗ്രൂപ്പിനുള്ളിലെ തർക്കം കൂടുതൽ രൂക്ഷമായത്.

ടാറ്റയിലെ ആഭ്യന്തര തർക്കങ്ങൾക്ക് പിന്നിൽ കേന്ദ്രസർക്കാരാണെന്നും വിഷയത്തിൽ നീതി ഉറപ്പാക്കാൻ കോൺഗ്രസ് പ്രവർത്തിക്കുമെന്നും രാഹുൽ ഗാന്ധി വ്യക്തമാക്കി.