കേരളം

വൈദ്യുതി കരാർ വിവാദത്തിൽ സമവായ നീക്കം; ക്ലിഫ് ഹൗസ് ചർച്ചയിൽ മഞ്ഞുരുകി, പുതിയ കരാർ പരിഗണനയിൽ

ക്ലിഫ് ഹൗസിൽ നടന്ന ചർച്ചയിൽ വൈദ്യുതി പർച്ചേസ് കരാർ വിവാദത്തിൽ സമവായ നീക്കമായി. നിലവിൽ വൈദ്യുതി ക്ഷാമമില്ലെന്ന് വിലയിരുത്തിയ യോഗം പുതിയ കരാർ സാധ്യതകൾ തേടാനും തീരുമാനിച്ചു. മുഖ്യമന്ത്രി, മന്ത്രിമാരായ സണ്ണി ജോസഫ്, രമേശ് ചെന്നിത്തല എന്നിവർ ചർച്ചയിൽ പങ്കെടുത്തു.

Cliff House Beneath Electric

വലിയ രാഷ്ട്രീയ തർക്കങ്ങൾക്ക് വഴിവെച്ച വൈദ്യുതി പർച്ചേസ് വിവാദത്തിൽ സമവായത്തിലേക്ക് നീക്കം. ക്ലിഫ് ഹൗസിൽ നടന്ന ചർച്ചയിൽ അഭിപ്രായവ്യത്യാസങ്ങൾ പരിഹരിക്കാനുള്ള ധാരണയായെന്നാണ് റിപ്പോർട്ട്. മുഖ്യമന്ത്രി വി.ഡി. സതീശനും മന്ത്രിമാരായ സണ്ണി ജോസഫും രമേശ് ചെന്നിത്തലയും ചർച്ചയിൽ പങ്കെടുത്തു.

കെഎസ്ഇബി എംഡിയുമായി പ്രത്യേകം ചർച്ച നടത്തിയെന്ന വാർത്ത മുഖ്യമന്ത്രി നിഷേധിച്ചു. ഉദ്യോഗസ്ഥരുടെ യോഗത്തിന് ശേഷം എംഡിയുമായി സംസാരിച്ചതാണെന്നും അദ്ദേഹം വിശദീകരിച്ചു. നിലവിൽ സംസ്ഥാനത്ത് വൈദ്യുതി ക്ഷാമമില്ലെന്നും അടുത്ത രണ്ട് മാസത്തേക്ക് വൈദ്യുതി വാങ്ങേണ്ട സാഹചര്യമില്ലെന്നും ഉദ്യോഗസ്ഥർ അറിയിച്ചതായി മുഖ്യമന്ത്രി പറഞ്ഞു.

ചർച്ചയിൽ സണ്ണി ജോസഫ് എതിർപ്പ് ഉന്നയിച്ചില്ലെന്നാണ് വിവരം. ഭാവിയിലെ ആവശ്യങ്ങൾ പരിഗണിച്ച് പുതിയ വൈദ്യുതി കരാറിനുള്ള സാധ്യതകൾ തേടാനും ധാരണയായി. ബോർഡ്-കോർപറേഷൻ ചർച്ചയ്ക്കിടെയാണ് വൈദ്യുതി പർച്ചേസ് വിവാദവും ചർച്ചയായത്.

ജിഎൻഎ കരാർ റദ്ദാക്കിയത് വിവാദമായി

ജിഎൻഎയുമായുള്ള വൈദ്യുതി കരാർ റദ്ദാക്കിയതും ഹിമാചലിൽനിന്ന് വൈദ്യുതി വാങ്ങാനുള്ള നീക്കവും വൈദ്യുതി വകുപ്പിനുള്ളിൽ അഭിപ്രായവ്യത്യാസങ്ങൾക്ക് കാരണമായിരുന്നു. ജിഎൻഎയുമായുള്ള കരാർ റദ്ദാക്കിയ വിവരം മാധ്യമങ്ങളിലൂടെയാണ് അറിഞ്ഞതെന്ന സണ്ണി ജോസഫിന്റെ പ്രതികരണം വലിയ ചർച്ചയായിരുന്നു.

വൈദ്യുതി ബോർഡ് ചെയർമാനും ഊർജ സെക്രട്ടറിയും മുഖ്യമന്ത്രിയുമായി ചർച്ച നടത്തി തീരുമാനമെടുത്തുവെന്നാണ് വാർത്തകളിലൂടെ മനസ്സിലാക്കിയതെന്നും മന്ത്രി വ്യക്തമാക്കിയിരുന്നു. മന്ത്രിയെ അറിയിക്കാതെ തീരുമാനങ്ങൾ എടുത്തെന്ന തരത്തിലുള്ള വിമർശനങ്ങളും ഇതോടെ ഉയർന്നു.

മുഖ്യമന്ത്രിയുടെ വിശദീകരണവും ചർച്ചയായി

വൈദ്യുതി മന്ത്രിയുടെ ആരോപണങ്ങൾ മുഖ്യമന്ത്രി തള്ളിയതും വിവാദത്തിന് കൂടുതൽ ചൂടുപകർന്നു. വൈദ്യുതി ബോർഡ് അയച്ച ഫയൽ മന്ത്രി തനിക്ക് കൈമാറുകയായിരുന്നുവെന്നും തീരുമാനമെടുത്ത ശേഷം ഫയൽ മന്ത്രിക്ക് തിരിച്ചയച്ചെന്നും മുഖ്യമന്ത്രി വിശദീകരിച്ചു. മന്ത്രി തന്നെയാണ് പിന്നീട് ഫയൽ ബോർഡിന് കൈമാറിയതെന്നും അദ്ദേഹം പറഞ്ഞു.

ഇതിനിടെ, കെഎസ്ഇബി ചെയർമാൻ എൻ. പ്രശാന്ത് കഴിഞ്ഞ ദിവസം വൈദ്യുതി മന്ത്രി സണ്ണി ജോസഫുമായി കൂടിക്കാഴ്ച നടത്തി. ഇതുവരെ ഉണ്ടായ സംഭവവികാസങ്ങൾ ചെയർമാൻ മന്ത്രിയെ ധരിപ്പിച്ചതായാണ് സൂചന. പിന്നാലെയാണ് ക്ലിഫ് ഹൗസിൽ സമവായ ചർച്ച നടന്നത്.

വൈദ്യുതി കരാർ സംബന്ധിച്ച തർക്കം പരിഹരിച്ച് ഭാവിയിലെ വൈദ്യുതി ആവശ്യങ്ങൾക്കായി പുതിയ കരാർ സാധ്യതകൾ പരിശോധിക്കാനാണ് ഇപ്പോഴത്തെ നീക്കം.

അഭിപ്രായങ്ങൾ

ആദ്യം അഭിപ്രായം പറയൂ.